Tha duaisean fìor mhath ann an roinn FilmG Òigridh (faic gu h-ìosal). Feumar ge-tà, na duaisean a chleachdadh airson uidheamachd filmidh no gearradh a cheannach, no feumaidh e dhol a dh'ionnsaigh cùrsa trèanaidh. Ma chaidh am film a dheànamh tro bhùth-obrach sgoile thèid an duais a thabhann dhan sgoil agus feumar an tidsear taghadh a dheànamh air an uidheamachd a thèid a cheannach. Mas e buidheann no aon duine leis fhèin a bhuannaicheas, feumar fhathast inbheach airson cead a thoirt air dè an uidheamachd a thèid a cheannach.
Thèid duaisean nas lugha a thabhainn de bhileagan Amazon.
Ma shoirbhicheas leat agus gum buannaich thu duais thèid iarraidh ort taghadh a dhèanamh agus ceannaichidh cuideigin de sgioba FilmG an duais dhut.
Tha an duais sa airson am film as fheàrr a thèid a dhèanamh ann an Roinn na h-Òigridh, 12-17. Tha sinn a’ coimhead airson film a tha cruthachail, inntinneach, ùr-nodha, agus a bheir tlachd don luchd-amharc. Tha sgeulachd làidir is sgriobt mhath riatanach, agus gun tèid a h-uile pàirt den fhilm fhighe ri chèile gu math.
Duais: £1000 a dh’ionnsaigh uidheamachd no trèanadh
Tha Fèis CIAK Junior a' ruith gach bliadhna san Eadailt agus thèid buannaiche na duais sa a thaghadh bho filmichean nam bùithtean-obrach. Bidh am film a ghlèidheas air a dheagh stiùireadh agus cruthachail.
Duais: Turas gu fèis film eadar-nàiseanta
Tha tòrr a bharrachd iarrtas ann a-niste bho chlann a tha airson filmichean a dhèanamh na chleachd! Tha sinn a’ coimhead airson film a chaidh a dhèanamh às aonais taic no trèanadh, a bheir tlachd don luchd-amharc. Faodaidh filmichean a bhith air an clàradh air camara no fòn-làimhe.
Duais: £500 a dh’ionnsaigh uidheamachd no trèanadh
Tha sinn a’ sireadh film aithriseach a tha air a dheagh rannsachadh agus air a dheagh chur ri chèile, le sgriobt agus agallamhan làidir, a tha a’ taisbeanadh sgeulachd inntinneach dhan luchd-amharc.
Duais: £500 a dh’ionnsaigh uidheamachd no trèanadh
Tha cuid a dh’fhilmichean ann a tha sònraichte tarraingeach a thaobh èideadh is suidheachadh, agus tha tòrr obair ann dha na buidhnean seo mus tòisich iad air clàradh. Tha sinn airson daoine fhaicinn a’ cur gu feum na tha mun cuairt orra gus coltas grinn a chur air am film. Cumaidh sinn sùil gheur air leithid: solas, suidheachadh, maise-gnùis, èideadh, agus props.
Duais: £500 a dh’ionnsaigh uidheamachd no trèanadh
Tha sinn an-còmhnaidh a’ feuchainn ri tàlant ùr a’ lorg air beulaibh a’ chamara agus tha sinn airson cleasachd shònraichte a chomharrachadh. Thèid an duais sa chun an neach as fheàrr a lìbhrigeas am pàirt, ann am film de sheòrsa sam bith.
Duais: £250 ann an teisteanas
Tha Gàidhlig aig cridhe FilmG agus tha sinn airson moladh a dhèanamh air an fheadhainn a tha a’ dèanamh oidhirp, a’ sealltainn tuigse, agus a tha siùbhlach nan cuid labhairt.
Duais: £500 a dh’ionnsaigh uidheamachd no trèanadh
Fosgailte do luchd-inntrigidh san àrd-sgoil
Tha Gàidhlig aig cridhe FilmG agus tha sinn airson luchd-ionnsachaidh a tha a’ dèanamh deagh oidhirp na sgilean cànain aca a thoirt air adhart, agus a tha a’sealltainn tuigse, a mholadh.
Duais: £500 a dh’ionnsaigh uidheamachd no trèanadh
Thar nam bliadhnaichean, tha bun-sgoiltean air ùidh a shealltainn ann am FilmG, agus mar sin tha sinn air an duais seo a chur air adhart dhaibhsan gu sònraichte agus buidhnean nach eil ceangailte ri àrd-sgoiltean. Leis gu bheil a’ chlann a tha seo nas òige na farpaisich eile, tha dùil againn gum bi barrachd taic a dhìth bho inbhich. Tha sinn a’ coimhead airson film – de sheòrsa sam bith –a tha air a chur ri chèile gu cruthachail, le sgeulachd ùr a bheir tlachd agus toileachas do dhaoine.
Duais: £500 a dh'ionnsaigh na sgoile/na buidhne
Fosgailte do chlasaichean bun-sgoile
Fosgailte do chlubaichean òigridh do chloinn aig aois bun-sgoile
Faodaidh filmichean a bhith air an stiùireadh le inbheach
Cha bhi bùithtean-obrach air an tabhann dha na buidhnean seo, agus cha bhi cothrom aig luchd-tagraidh air na duaisean eile ann an Roinn na h-Òigridh
Tha fèill mhòr air Duais Roghainn an t-Sluaigh agus ‘s iad an fheadhainn a gheibh an àireamh as àirde de bhòtaichean a ghlèidheas.
Duais: £100