Air oidhche Haoine, chaidh buannaichean farpais fhilmichean goirid Gàidhlig na bliadhna-sa ainmeachadh gu luchd-èisteachd de cha mhòr 500 filmeadair, proifeiseantaich gnìomhachais, agus luchd-leantainn FilmG.

Chaidh an tachartas a chumail ann an Seòmar Laomainn an SEC ann an Glaschu agus chaidh a phreasantadh le aoighean BBC ALBA Lana Pheutan agus Hannah NicKirdy a bha os cionn buannaichean a chaidh a chrùnadh thairis air 16 roinnean.

B’ e Parker Dawes a choisinn am Film as Fheàrr le Iomlaineachd san fharpais -18. Seo an dàrna bliadhna a tha Dawes air an duais a chosnadh, mar theisteanas air a chomas sgeulachdan innse sa Ghàidhlig agus an leasachadh leantainneach na cheàird, ga dhearbhadh mar aon de na tàlantan òga as fheàrr ann an Alba. 

A’ buannachadh am Film as Fheàrr san fharpais 18+, bha am film aithriseach le Kayleigh Bell, Sealladh mo Sheanair, a tha a’ sealltainn “Sealladh a Seanair” tro shreath agallamhan. Seo a’ chiad duais a choisinn Kayleigh aig na Duaisean FilmG.

Am measg an fheadhainn a choisinn duaisean eile, tha Àrd-sgoil Inbhir Theòrsa a choisinn an Duais Bhrosnachail san fharpais -18 airson an fhilm Ar Sealladh aig Àrd-sgoil Inbhir Theòrsa, film aithriseach a tha a’ rannsachadh bheachdan thidsearan is sgoilearan Inbhir Theòrsa air foghlam tro mheadhan na Gàidhlig. Chaidh an Duais Bhrosnachail san fharpais 18+ gu Luca Kerr à Dùn Èideann le Campachadh.

Choisinn a’ chompanaidh riochdachaidh Dealbhan Spèileachan-Rola air Chall, à Glaschu, an Sgeulachd as Fheàrr (-18) airson an fhilm aca A Bheil Thu An Sin? Seo a’ chiad bhliadhna a chaidh a’ chompanaidh an sàs ann am FilmG, le oileanach àrd-sgoile, Tomas Dimbleby Weber os a chionn.

Chaidh an Sàr-Dhuais Teicnigeach (18+) gu Rachel Urchadan à Inbhir Nis, airson a cuid obrach air an fhilm aithriseach Còisir – Mgr M! mun bhuaidh a thug Mgr Mac a’ Mhaoilein agus a chòisir air Bun-sgoil Ghàidhlig Inbhir Nis. Chaidh an Rionnag as Fheàrr (-18), an duais airson an tabhartas as fheàrr far-sgrion, gu Jasmine Krzyzanowska-Pawlak bho Acadamaidh Allt a’ Mhuilinn ann an Inbhir Nis – a tha ag ionnsachadh Gàidhlig mar an treas chànan aice – airson a h-obair camara air Sealladh na Bànrigh. 

Tha Fionnlagh Moireasdan, a choisinn Cluiche as Fheàrr an-uiridh, air an duais a bhuannachadh a-rithist san fharpais -18. Am-bliadhna tha e ga roinn le a bhràthair Calum airson na rinn iad anns a’ chomadaidh Bràthair Mòr Nan Gàidheal!!. Anns an fharpais 18+, choisinn Evie Waddell, seinneadair Gàidhlig is Albais a bhuineadh do Shiorrachd Shruighlea, an Cluiche as Fheàrr airson an fhilm aice Fios no Fois. Tha am film aice a’ sgrùdadh na mì-chinnt a th’ aig eòlas bodhar tro òrain Ghàidhlig, dannsa, agus BSL.

Bha dithis ann a bhuannaich Duais Roghainn FilmG – air an taghadh le bhòt poblach tro làrach-lìn FilmG. Anns an fharpais -18 b’ i Sgoil Lìonacleit, ann am Beinn na Faoghla, a bhuannaich airson an fhilm Aillse, Sealladh Marsaili a tha a’ sealltainn an turas a bh’ aig Marsaili le aillse nuair a bha i òg. Anns an fharpais 18+, choisinn Niamh NicFhionghain às an Eilean Sgitheanach an Duais Roghainn FilmG airson an fhilm aice Glac an Latha.

Gheibhear liosta slàn de fhilmichean FilmG aig www.filmG.co.uk. Chìthear prògram nan duaisean air iPlayer BBC ALBA agus sruth beò an tachartais gu lèir ri fhaighinn air YouTube BBC ALBA.
 

Thuirt Megan Dale, Manaidsear Pròiseict FilmG: “Abair oidhche! Tha sinn fhathast a’ meòrachadh air a’ bheairteas de thàlant agus dealas a nochd aig na Duaisean FilmG. Tha 2024 air a bhith na bliadhna de dh’atharrachaidhean mòra airson FilmG; bha a’ chiad luchd-inntrigidh againn à Canada; b’ i a’ chiad bhliadhna againn aig an SEC; bha preasantairean ùra againn; agus an luchd-èisteachd as motha a bh’ againn a-riamh le faisg air 500 neach aig na duaisean. Bha an t-ionad nas motha a’ ciallachadh gum b’ urrainn barrachd dhaoine a bhith an làthair aig na duaisean agus rinn seo an tachartas nas beòthail. Meal an naidheachd air a h-uile neach a chaidh ainmeachadh agus a bhuannaich – bha e math am faicinn uile ann an aodach snasail airson oidhche nan duaisean agus bha e dha-rìribh a’ faireachdainn mar na Baftas Gàidhlig.”
 

Thuirt Magaidh Nic an Tàilleir, Manaidsear Clàr-phrograman MG: “Meal an naidheachd air a h-uile duine a chaidh ainmeachadh agus a bhuannaich – abair oidhche sgoinneil a’ comharrachadh nan sgeulachdan Gàidhlig as fheàrr. ‘S e an rud a tha follaiseach – a’ coimhead air liosta thàlantach buannaichean FilmG – gu bheil sgeulaichean Gàidhlig a’ tighinn bho air feadh na h-Alba. Tha buannaichean againn à Inbhir Theòrsa, Inbhir Nis, an t-Eilean Sgitheanach, Dùn Èideann, Glaschu, agus na h-Eileanan an Iar. Taing mhòr do Lana agus Hannah a rinn obair ionmholta ann a bhith a’ cumail an rùm air a bheò-ghlacadh agus iad a’ toirt seachad dhuaisean don ath-ghinealach de fhilmeadairean Gàidhlig. Tha sinn an dòchas gum brosnaich oidhcheannan mar Duaisean FilmG luchd na Gàidhlig a’ cumail orra a’ dèanamh fhilmichean, agus gu bheil na sgeulachdan agus na guthan aca air leth cudromach ann a bhith a’ cumadh sgeulachdan na h-Alba.”