Tha FilmG air na geàrr-liostaichean fhoillseachadh air thoiseach air cuirm dhuaisean FilmG sa Mhàrt, agus iad air an crathadh as motha a dhèanamh air na roinnean ann an eachdraidh na farpais.

Airson a’ chiad uair ann an 17 bliadhna, cha bhi roinn Film as Fheàrr ann an co-fharpaisean -18 no 18+. An àite sin, thèid na prìomh dhuaisean a-nis a thoirt seachad airson an Dràma as Fheàrr, am Prògram Aithriseach as Fheàrr, agus an Comadaidh as Fheàrr – a’ soilleireachadh farsaingeachd tàlant sgeulachdas na Gàidhlig.

Am-bliadhna cuideachd bha atharrachadh mòr eile ann: cha deach cuspair idir air beulaibh nam filmeadairean, le tagraidhean de sheòrsa sam bith air am brosnachadh gus làn shaorsa chruthachail a cheadachadh. Agus thairis air 127 tagradh gu h-iomlan san dà fharpais, bha am fòcas am-bliadhna air leasachadh agus adhartas follaiseach.

Thagh britheamhan neo-eisimeileach na geàrr-liostaichean thar 15 roinnean, agus nì am poball co-dhùnadh air an dà dhuais mu dheireadh tro bhòt air-loidhne.

Geàrr-liostaichean 18+

Bhuannaich na ceithir  filmeadairean air geàrr-liosta Dràma as Fheàrr duais aig FilmG roimhe, a’ gabhail a-steach buannaiche am Film as Fheàrr an-uiridh, Kayleigh Bell.

Tha trì filmichean a’ seasamh a-mach le trì ainmeachaidhean an urra: Mhàiri NicGillìosa às an Eilean Sgitheanach agus Eilidh Chandler & Rae NicÌomhair airson nam filmichean aithriseach aca, cuide ri ‘Geama’ an dràma aig Luca Kerr, fear a bhuannaich an-uiridh cuideachd.

Geàrr-liostaichean -18

Tha Parker Dawes, buannaiche Film as Fheàrr an-uiridh, air dà gheàrr-liosta, nam measg an Dràma as Fheàrr.

Chan eil ach ceithir filmichean eile a’ cruinneachadh iomadh ainmeachadh – Àrd-sgoil Gheàrrloch, Sgoil an Taobh Siar, agus Àrd-sgoil Phort Rìgh uile le dà ainmeachadh, agus fhuair buidheann CnaG na Hearadh air trì geàrr-liostaichean airson an comadaidh aca mun phrògram telebhisein The Voice.

Bha deagh thaisbeanadh aig sgoiltean Inbhir Pheofharain cuideachd, le dà fhilm air an ainmeachadh bho Bhun-sgoil Inbhir Pheofharain agus aon bho Acadamaidh Inbhir Pheofharain.

Thuirt Murchadh MacSuain, Stiùiriche Pròiseict FilmG, “’S e seo am FilmG as làidire a-riamh a thaobh càileachd agus tha geàrr-liostaichean farpaiseach againn. Tha bhòt a’ phobaill air a bhith làidir cuideachd, agus mar sin bidh e brosnachail faicinn dè an dà fhilm a thig am bàrr sna roinnean sin”.

Còmhla ris a’ cho-fharpais, bha bùthan-obrach, clubaichean agus tachartasan FilmG ag àrach an ath ghinealach de sgeulaichean Gàidhlig, a’ toirt slighe do fhilmeadairean gus slighe fhaighinn a-steach do shaoghal nam meadhanan Gàidhlig.

Thuirt Magaidh Nic an Tàilleir, an Ceannard Foillseachaidh aig MG ALBA: “Tha FilmG air leth luachmhor dha na meadhanan Gàidhlig, leis gu bheil e a’ taisbeanadh an tàlant ùr a tha a’ tighinn troimhe. Tha obair chruaidh air a bhith aig na britheamhan am-bliadhna ach tha sinne moiteil mu gach filmeadair bho air feadh na dùthcha agus mar a bha iad ag innse nan sgeulachdan aca sa Ghàidhlig.”

Thèid na buannaichean ainmeachadh aig cuirm dhuaisean FilmG aig an SEC ann an Glaschu air Dihaoine, 7 Màrt 2025. 

Geàrr-liostaichean air fad:

 

-18

 

Dràma as Fheàrr

Cus – Àrd-sgoil Gheàrrloch 

Air Choire – Parker Dawes

Spògan Buidhe – Club FilmG, Àrd-sgoil Phort Rìgh

Seachad – Àrd-sgoil Ulapuil

 

Film Aithriseach as Fheàrr

An Treasamh Sùil – Tomas Dimbleby Weber

Òran na Cloiche – ‘Dà Bhogsa agus Bogha’ & Fionnlagh Moireasdan

Na Fònaichean Tha Sin..! Tràilleachd na Fònaichean – Sgoil Lìonacleit 

FORSAN – Rosa O’Halloran

 

Comadaidh as Fheàrr

An Seachnadh – Acadamaidh Inbhir Pheofharain

Na Mèirlich – Bun-sgoil Inbhir Pheofharain

Dè Nì Sinn? – Sgoil an Taobh Siar

An Guth – CnaG Na Hearadh

 

Sgioba Òg as Fheàrr

Na Fuadaichean – Bun-sgoil Inbhir Pheofharain

Pantar Phàislig – Sgoil an Iar

Muncaidh Bhreascleit – Sgoil Bhreascleit

An Guth – CnaG Na Hearadh

 

Cumhachd na Gàidhlig

Nuair a bha mi Òg – Sgoil Uibhist a Tuath

Seanchas na Fairge – Sgoil Stafainn agus CnaG

Am Plana Gaoideach – Sgoil Bhàgh a’ Chaisteil 

Dè Nì Sinn? – Sgoil an Taobh Siar

 

An Duais Cruthachaidh  

Drogh Paitchyn / Clann Dona – Bun-scoil Ghaelgagh, Eilean Mhanainn

A-mach ‘s A-steach – Àrd-sgoil an Òbain

An Cluba Saidheans aig a Bh.Uas. Nic an Ceàrdaich – Àrd-sgoil Ghlinn Challdair

Faigh A-mach à Seo Mi! – Sgoil Ghràmair Dhùn Omhain

 

Sàr-dhuais Theicnigeach 

Parker Dawes – Air Choire

Alasdair MacDhòmhnaill – Baile Mhoire

Uilleam MacDhòmhnaill –  Am Fiùran

Alex Padarowski – Duine-èisg 

 

Cluiche as Fheàrr 

Emily King – An Guth

Eloise McNay – Geama

Lexy Chaimbeul – Cus

Jonathan Dòmhnallach – Spògan Buidhe

 

18+

 

Dràma as Fheàrr

Air a’ Bheing – Kayleigh Bell & Adam Stewart

Geama – Luca Kerr

Falach-Fead – AllanWith1Eils

Sinne, Nas Sine – Cara Turner & Ciorstaidh NicBheathain

 

Film Aithriseach as Fheàrr

Coinneach MacThòmais – Eilidh Chandler & Rae NicÌomhair

Orient – Dàibhidh Ó Briain

Anne Againne – Mhàiri NicIllìosa

A’ Bheàrn – Isica Ní Dhuibhginn

 

Comadaidh as Fheàrr

Falach-Fead – AllanWith1Eils

A’ Cluich – Riochdachadh Rambling Celt

Ar Eilean Breagha – Eilidh NicIain

Cunnart bho na Meanbh-chuileagan – An Clas Camelon

 

Film Dùthchais as Fheàrr

A’ Tilleadh Dhachaigh – Urras Oighreachd Ghabhsainn

Coinneach MacThòmais – Eilidh Chandler & Rae NicÌomhair

Orient – Dàibhidh Ó Briain

Anne Againne – Mhàiri NicIllìosa

 

Film Ciùil as Fheàrr

Cailleach Mhòr Stadhlaigh – Evie Waddell

Tha Smeòrach sa Mhadainn Chiùin – Cashlin NicCoinnich

Mhic Iain ‘ic Sheumais – Dlù

Chan Eil – Evie Waddell

 

Sàr-dhuais Theicnigeach

Rob MacNeacail – A’ Cluich

Mhàiri NicIllìosa – Anne Againne

Cashlin NicCoinnich – Tha Smeòrach sa Mhadainn Chiùin

Rae NicÌomhair – Coinneach MacThòmais

 

Cluiche as Fheàrr

Ró Ó hEadhra – Uisge-Bàis

Evie Waddell – Cailleach Mhòr Stadhlaigh

Choirstaidh NicArtair – Air a’ Bheing

Rachel Kate NicLeòid – Geama