Tha filmeadairean air feadh na dùthcha trang ag ullachadh leis gu bheil ceann-latha tagraidh FilmG a’ teannadh dlùth air 9 Dùbhlachd. Le co-fharpaisean fa-leth dhaibhsan fo aois 18 agus nas sine na 18, tha FilmG a’ brosnachadh ginealach ùr de sgeulaichean Gàidhlig, a’ fuasgladh na slighe gu cothroman anns na meadhanan Gàidhlig.

Ro cheann-latha na bliadhna-sa, tha sgioba FilmG a’ lìbhrigeadh sreath de cha mhòr 40 bùth-obrach film air feadh na h-Alba.

Anns na h-Eileanan an Iar, tha sia bùthan-obrach san amharc, agus tha An Lanntair ann an Steòrnabhagh ag obair còmhla ri Comunn na Gàidhlig gus am bùth-obrach aca fhèin a chumail aig deireadh na Samhna. ‘S ann ann an sgìre na Gàidhealtachd a chithear an àireamh as motha de bhùthan-obrach, le 17 a’ gabhail àite, agus ceithir eile ann an Earra-Ghàidheal is Bòd. Tha 12 bùth-obrach eile san amharc ann an sgìrean eile, a’ ciallachadh gu bheil cothrom aig filmeadairean air feadh na dùthcha air trèanadh agus goireasan gus na sgeulachdan aca a thoirt beò.

Tha FilmG fosgailte do chom-pàirtichean aig gach ìre agus an iomairt a’ tabhann àrd-ùrlair gus tàlant Gàidhlig àrach agus na filmichean aca a thaisbeanadh do luchd-amharc air feadh Alba agus nas fhaide air falbh. Thathas a’ brosnachadh dhaoine aig a bheil ùidh am film aca fhèin a chuir a-steach, ge bith an e ficsean, aithriseachd no beòthalachd a tha ann, agus ma tha feum air taic no cuideachadh gu faigh iad sin bho sgioba FilmG.

Thuirt Manaidsear Pròiseict FilmG, Sarah Urchadain: “Tha ùine gu leòr ann fhathast airson cur a-steach, leis a’ mhòr-chuid bho FilmG a’ dol air adhart san t-Samhain agus tràth san Dùbhlachd. Chaidh cuid de na filmichean a choisinn duaisean bho bhliadhnaichean roimhe an dèanamh taobh a-staigh latha fiù ’s agus mar sin cuiribh fios thugainn agus is urrainn dhuinn ur cuideachadh!”

Feumaidh tagraidhean FilmG a bhith sa Ghàidhlig agus chan fhaod iad a bhith nas fhaide na còig mionaidean. Airson tuilleadh fiosrachaidh mu FilmG agus airson am film agad a chur a-steach, tadhail air www.FilmG.co.uk no faodaidh sibh fios a chur chun sgioba tro na meadhanan-sòisealta.